На шляху да поспеху

Традыцыйна штогод у ДУА “Сярэдняя школа №4 г.Ваўкавыска” праходзіць TED-канферэнцыя па вучэбных прадметах “Беларуская мова і літаратура” і “Руская мова і літаратура”.

У гэтым навучальным годзе 1 лютага адбылася ўжо VIII TED-канферэнцыя “Майстар слова”. Яе ўдзельнікамі сталі 56 вучняў 3 – 8 класаў, трое з якіх выступілі ў дзвюх секцыях.

Дадзенае мерапрыемства вядома сваімі цікавымі, яскравымі, запамінальнымі, красамоўнымі выступленнямі, тэматыка якіх была звязана і з падзеямі Вялікай Айчыннай вайны, а таксама з тым, чым мы можам ганарыцца ў наш час. Асабліва запомніліся вусныя выказванні пра тое, якой цаной нам дасталася Перамога. Кожны з вучняў усвядоміў, што неабходна прыкласці ўсе намаганні, каб наша Радзіма квітнела і развівалася, а гэта залежыць цяпер толькі ад нас. Юныя “спікеры” таксама выказвалі свае думкі пра тое, ці патрэбен у школе мабільны тэлефон. Некаторыя выступленні суправаджаліся мультымедыйнымі прэзентацыямі.

Удзел у TED-канферэнцыі дазволіў вучням абгрунтоўваць свой пункт гледжання, развіваць навык публічных выступленняў, удасканальваць аратарскае майстэрства.

Членам журы вельмі спадабаліся выступленні вучняў. Складана было вызначыць пераможцаў, бо выказванне кожнага было ўнікальным, упэўненым, эмацыянальным і запамінальным. Усе ўдзельнікі TED-канферэнцыі атрымалі сертыфікаты, а пераможцы былі ўзнагароджаны яшчэ і дыпломамі. Выступленні юных “спікераў” будуць надрукаваны ў зборніку, які будзе захоўвацца ў школе.